Tags-Aangan

bhaa.ī ko hai bhaa.ī pe bharosa to bhalā hai
āñgan meñ bhī uTh jā.egī dīvār nahīñ to

ek darvāza jahāñ nuur bichhā rahtā thā
ek āñgan ki jahāñ koī bashar thā hī nahīñ

kyā zamāna thā mahaktī thiiñ vo kyārī ghar kī
ghar ke āñgan gul-o-gulzār huā karte the

raat bhar kamre meñ maiñ dubkā rahā aur āsmāñ
merī furqat meñ mire āñgan meñ royā sub.h tak

nigāh-e-shab tire āñgan meñ ḳhvāb DhūñDhe thī
ye ab ke zaḳhm bhī kaisā diyā nayā tū ne

dekhnā rañg-e-badan yaar ke pairāhan meñ
chāñdnī duudh sī chhiTkī hai mire āñgan meñ

bastī bastī qarya qarya kosoñ āñgan hai na muñDer
zehn ḳharāba dil vīrāna ghar a.asāb pe taarī hai

julte haiñ kaḌī dhuup meñ kyuuñ apne hī āñgan
sūraj to yahī hai jo ubhartā hai udhar bhī

ik kamrā sāyoñ se bharā hai ik kamrā āvāzoñ se
āñgan meñ kuchh ḳhvāb paḌe haiñ vaise ye ghar ḳhālī hai

un ke āñgan meñ bhī añgāre baras jā.eñge
āh-e-sozāñ na lagā dāman-e-aflāk meñ aag

'maḳhmūr' ta.āqub kar dekho kuchh duur nahīñ haath aa jaa.e
ik gum-shuda ḳhushbū kā jhoñkā āñgan se abhī guzrā hī to hai

raat āñgan meñ utrī nahīñ chāñdnī
chāñd shāḳhoñ meñ uljhā huā rah gayā

kis kī yādeñ kis ke chehre ugte haiñ tanhā.ī meñ
āñgan kī dīvāroñ par kuchh saaya saaya lagtā hai

pāzeb ke naġhmoñ kī vo rut biit chukī hai
ab sūkhe hue patte is āñgan meñ paḌe haiñ

mīlād ho ki majlis-e-ġham mubtalā tire
āñgan meñ dal ke farsh bichhā.e hue to haiñ

vo āñgan meñ lahrāte sāvan ke jhūle
rahe yaad har dam kabhī ham na bhūle

ḳhvāb ko zehn kahāñ hai na yahāñ hai na vahāñ
dil ke āñgan meñ kahīñ gor-e-ġharībāñ rakhnā

parī kyuuñ niiñd kī utre mirī palkoñ ke āñgan meñ
ki maiñ ne paal kar dil meñ ajab bohrān rakkhā hai

āñgan āñgan meñ vīrānī naach rahī hai
saaz uThānā kaisā naġhma gaanā kaisā

bābul ke āñgan se ik din har beTī ko jaanā hai
āñkhoñ meñ na.e ḳhvāb sajā kar tere dar tak aa.ī huuñ