Tags-Aankh

mujh se māñgegī mirī aañkh gulābī manzar
ho mire haath meñ tasvīr-e-butāñ achchhā hai

yahāñ par aañkh kā dekhā hamesha sach nahīñ hotā
jise patthar samajhte haiñ vo paiġhambar nikaltā hai

tasvīr us ke haath meñ lab par mirī ġhazal
dekhā na ek aañkh na jis ne sunā mujhe

duniyā-e-dūñ ko aañkh uThā kar na dekhiye
āshiq javān hote haiñ kab pīr-zāl ke

pahle-pahal to ḳhud se hī mansūb the ye ashk
ab us kī aañkh se bhī bahā jā rahā huuñ maiñ

ham apne dil kā dukhḌā ro rahe haiñ
tumhārī aañkh jhapkī jā rahī hai

vahāñ se aa ke us kī bhī phirī aañkh
vo tevar hī nahīñ ab nāma-bar ke

hijāb-e-ruḳh-e-yār the aap hī ham
khulī aañkh jab koī pardā na dekhā

garebāñ ke baTan pe ūñghtā thā
sitāra aañkh khul jaane se pahle

nigāhoñ ke manāzir be-sabab dhundhle nahīñ paḌte
hamārī aañkh meñ dariyā koī Thahrā huā hogā

maiñ to fasurda huuñ hī lekin ashk raqīb kī aañkh meñ bhī haiñ
ek mahāz pe haare haiñ ham ye rishta kyā kam rishta hai

vo bujh ga.ī sitāra-adā aañkh kab kī dost
dil meñ kisī ke pyaar kī hasrat nahīñ rahī

ḳhamosh rah kar pukārtī hai
vo aañkh kitnī sharārtī hai

vo ik aañkh jo merī apnī bhī hai
na aa.ī nazar to kidhar jā.ūñgā

jis ne dil māñgā nahīñ chhīn liyā hai mujh se
aap meñ aa.uuñ to vo aañkh hayā sī likkhūñ

aañkh meñ manzar to aa sakte haiñ sūrat oḌh kar
aa.ine to aks se zanjīr ho sakte nahīñ

dekhtī aañkh 'ziyā' hairāñ hai dekh ke dahr ke rañg
pal kī pal meñ badal jaate haiñ manzar sair ke biich

soch-samajh sab sach hai lekin dil kī baat hai aur
duur thī yuuñ to aañkh bhañvar kī pahuñchā tair ke biich

dil numūdār huā hai dil meñ
aañkh ik aañkh se bhar aa.ī hai

raushan-dān se dhuup kā TukḌā aa kar mere paas girā
aur phir sūraj ne koshish kī mujh se aañkh milāne kī