Tags-Aankh

donoñ se maiñ bach kar tere ḳhvāb-o-ḳhayāl se guzar gayā
dil kā sahrā ek taraf thā aañkh kā dariyā ek taraf

nishāna tīr-e-nigah kā ba-dil karūñ 'ārif'
laḌā.e aañkh agar mujh se jañg-jū merā

ik ḳhvāb ki jo aañkh bhigone ke liye hai
ik yaad ki siine meñ chubhone ke liye hai

bast-o-yakum-e-māh-e-moharram hai aaj
jis aañkh ko dekhiye vo pur-nam hai aaj

tumhārī aañkh meñ dekhā hai sab ne dasht magar
mujhe to in meñ samundar dikhā.ī detā hai

bajā hai ḳhvāb-navardī pa ḳhvāb aaise hoñ
khule jo aañkh to apnā hī ghar khañDar na lage

khol aañkh zamīñ dekh falak dekh fazā dekh!
mashriq se ubharte hue sūraj ko zarā dekh!

aañkh vaalo yuuñ mirī ḳhaak tamāshā na karo
sunñe vaalo ye mirī tez-ravī boltī hai

apnā bātin ḳhuub hai zāhir se bhī ai jān-e-jāñ
aañkh ke laḌne se pahle jī laḌā baiThe haiñ ham

aañkh ik abr ke TukḌe ko taras jaatī thī
bārishoñ se jahāñ ab itnī tabāhī aa.ī

jo terī bazm se uTThā vo is tarah uTThā
kisī kī aañkh meñ aañsū kisī ke dāman meñ

ye jism hai ki faqat shor gul hai sāñsoñ kā
ye aañkh hai ki koī ḳhvāb dekhtī na milī

kar ga.e ashk mirī aañkh ko jal-thal kyā kyā
ab ke barsā hai tirī yaad kā bādal kyā kyā

'anjum' ne aañkh khol ke dard-o-alam jo dekhe haiñ
auroñ ne ḳhvāb meñ agar dekhe to aise ḳhvāb kyā

zarā sā ḳhvāb ko toḌā ḳharāsh Daal gayā
ki aañkh meñ vo nishānī bhī hai alag sab se

chhīn le hairat-e-nazzāra ye bīnā.ī bhī
aañkh hotī hai to manzar nahīñ dekhā jaatā

zarā sī pī ke bahakne kī hai sazā shāyad
jo sirf aañkh chhalaktī hai ab sharāb kahāñ

tum mujhe bevafā.ī ke taane na do mere mahbūb maiñ bevafā to nahīñ
tum bhī maġhrūr ho maiñ bhī ḳhuddār huuñ aañkh ḳhud hī bhar aa.e to maiñ kyā karūñ

zāhir hai haq kā jalva gar aañkh ho to dekhe
'markaz' ḳhudā ko aalam bhūle pukārte haiñ