Tags-Aankh

ye palkoñ par na.e aañsū nahīñ haiñ
azal se aañkh hai pur-nam hamārī

ḳhvāb meñ bhī merī zanjīr-e-safar kā jāgnā
aañkh kyā lagnā ki ik saudā-e-sar kā jāgnā

dekhne ke liye ik shart hai manzar honā
dūsrī shart hai phir aañkh kā patthar honā

dil ke sahrā meñ koī aas kā jugnū bhī nahīñ
itnā royā huuñ ki ab aañkh meñ aañsū bhī nahīñ

aañkh bechain tirī ek jhalak kī ḳhātir
dil huā jaatā hai betāb machalne ke liye

abad talak ke manāzir sameT lete haiñ
zarā sī aañkh ko zambīl karne vaale log

us pe bas aise hī ghabrā.ī huī phirtī thī
aañkh se husn simaTtā hī nahīñ thā us kā

dast-e-shafqat kaTā aur havā meñ muallaq huā
aañkh jhapkī to palkoñ pe Thahrī huī ḳhvāhisheñ dhuul meñ aT ga.iiñ

zamīñ se tā-falak chhā.ī huī hai raushnī-e-lā
ye saarā shahr hai merī nazar meñ aañkh kā dhokā

na dil meñ dard hī baaqī hai ab na aañkh meñ ashk
aḳhīr vaqt hai pāyān-e-iztirāb aayā

bekasī meñ jo yaad ghar aayā
aañkh ke saath dil bhī bhar aayā

aañkh paḌtī hai kahīñ paañv kahīñ paḌtā hai
sab kī hai tum ko ḳhabar apnī ḳhabar kuchh bhī nahīñ

is tarah aañkh se Tapkā hai lahū
shāḳh se phuul girā ho jaise

vo niiñd apne bachpane kī raah meñ ujaḌ ga.ī
us aañkh ne bhī mojazoñ kā ik jahān kho diyā

phoḌ duuñ kam-baḳht ā.īne kī aañkh
sāmne mere tujhe ghūrā kiyā

mire ḳhvāboñ kā us kī aañkh se rishta nahīñ TuuTā
mirī parchhā.īñ akasr jhiil ke is paar jaatī hai

kisī parī ke ḳhayāloñ meñ raqs karte rahe
hamārī aañkh se aañsū nikal ke uḌte rahe

rāt-bhar dekhtā aayā huuñ charāġhoñ kā dhuāñ
sub.h-e-āshūr se ab aañkh milānā hai mujhe

aañkh maiñ gard-e-ḳhud-numā.ī thī
phir mujhe aa.ine ne saaf kiyā

raushnī chaar taraf phailegī
aaj vo aañkh jidhar kholeñge