Tags-Aankh

dekh use sab zikr hamārā karte haiñ
us kī aañkh meñ sirf hamārā chehra hai

bīmār jo terī chashm kā hai
nargis pe kab aañkh Dāltā hai

gayā vo daur-e-siyāh-mastī rahā faqat nām-e-mai-parastī
jo zo.af-e-pīrī meñ aañkh kholī to kuchh tabī.at pe baar dekhā

tire firāq meñ jo aañkh se ravāñ huā hai
vo ashk-e-ḳhūñ hī mire ġham kā tarjumāñ huā hai

ā.ina-rañg kā sailāb hai pāyāb bahut
aañkh miltī to ye manzar bhī dikhāte ḳhud ko

har taraf to uḌ rahī hai dhuul sī
aañkh apnī maiñ kahāñ tak mūñdtā

dil to rotā rahe or aañkh se aañsū na bahe
ishq kī aisī rivāyāt ne dil toḌ diyā

manzil-e-ḳhvāb hai aur mahv-e-safar paanī hai
aañkh kyā kholīñ ki tā-hadd-e-nazar paanī hai

na kisī kī aañkh kā nuur huuñ na kisī ke dil kā qarār huuñ
jo kisī ke kaam na aa sake maiñ vo ek musht-e-ġhubār huuñ

hasrat ke sadqe aañkh ke malte hī khul gayā
vo kuchh ki mumkināt se jis kā bayāñ na thā

dekhā na aañkh uThā ke mujhe nāzukī se jhuuT
aisā to kuchh nigāh kā uThānā garāñ na thā

shab mujh se aañkh maltī rahī dil raqīb se
yahāñ yuuñ sitam rahā ki kisī par ayaañ na thā

hamārī aañkh meñ quvvat hai rañg chakhne kī
hamārī aañkh batātī hai zā.iqa mire dost

zarb-e-tesha kī sadā thī kaisī
aañkh malte hue patthar jaage

niiñd se aañkh vo mil kar jaage
kitne so.e hue manzar jaage

be-bāk na dekhā koī qātil ke barābar
sharm aañkh meñ paa.ī na ga.ī til ke barābar

ai dost! tirī aañkh jo nam hai to mujhe kyā
maiñ ḳhuub hañsūñgā tujhe ġham hai to mujhe kyā

ab yahī rañj mirī aañkh meñ aa baiThā hai
toḌ kar aa.ina dekhā kahīñ hairat na milī

ġhaflat pe na hone paa.e hoshyār
Tuk aañkh khulī ki so ga.e ham