Tags-Aankh

ik soz-e-fusūñ gar hai tirī aañkh meñ pinhāñ
hai dil ke liye shauq kā fitrāk nazar meñ

huuñ mutma.in ki huuñ āsūda-e-ġham-e-jānāñ
majāl kyā ki ḳhushī dekhe aañkh bhar ke mujhe

gul-gasht meñ dāman muñh pe na lo nargis se hayā kyā hai tum ko
us aañkh se parda karte ho jis aañkh meñ pardā koī nahīñ

laḌī 'mus.hafī' aañkh jis se ki apnī
par āḳhir use āshnā kar chuke ham

nargisīñ aañkh bhī hai abru-e-ḳhamdār ke paas
dūsrī aur bhī talvār hai talvār ke paas

kis ghane jañgal meñ jā kar ab chhupeñ bastī ke log
aañkh sī ubhrī huī sūraj kī peshānī meñ hai

aañkh hai labrez shāyad ro paḌegā tū abhī
jaise zillat kā mudāvā aañkh ke paanī meñ hai

har aañkh meñ DhūñDhtā huuñ ḳhud ko
maiñ nuur huuñ bujhte ratjage kā

ḳhud-ba-ḳhud aañkh badal kar ye savāl achchhā hai
roz kab tak koī pūchhā kare haal achchhā hai

kisī udaas aañkh ke asiir ho ga.e
baḌe ġharīb log the amiir ho ga.e

ham pe vo vaqt hai ab chāhe ḳhushī aa.e ki ġham
aañkh nam hotī hai jazbāt badal jaate haiñ

aah aayā hī thā vo sapne meñ
daf.atan aañkh khul ga.ī merī

mirī aañkh meñ jo Thahar gayā
tirī furqatoñ kā malāl hai

mayassar hameñ ḳhvāb-e-rāhat kahāñ
zarā aañkh jhapkī sahar ho ga.ī

āhanī azm hoñ par aañkh bhī nam hai merī
bhīge mausam meñ mujhe zañg se Dar lagtā hai

ḳhvāb phūloñ ke aañkh ne gūñdhe
phir chaman kyuuñ udaas merā hai

hove kis tarah dilerāna vo āshiq se do-chār
apne bhī aks se jo aañkh ki sharmātī hai

vo din bhī the ki aañkh bichhāte the barg-o-gul
ab mujh pe multafit ḳhas-o-ḳhāshāk bhī nahīñ

qadam qadam par in kī zarūrat paḌtī hai
aañkh se kahnā aañsū pas-andāz kare

ye mujh se aañkh milātā nahīñ hai kyuuñ saaqī
mire nasīb kā shāyad nahīñ hai jaam koī