Tags-Aankh

is daur meñ ga.ī hai muravvat kī aañkh phuuT
mādūm hai jahān se chashm-e-hayā-parast

adā hai ḳhvāb hai taskīn hai tamāshā hai
hamārī aañkh meñ ik shaḳhs be-tahāshā hai

ab kahānī ko bhī uljhā zarā afsāna-tarāz
shauq kuchh aur baḌhā aañkh ko hairānī de

kisī kī aañkh banjar ho ga.ī hai
kisī ke ashk bartan dho rahe haiñ

shauq kahtā hai ki har jism ko sajda kiije
aañkh kahtī hai ki tū ne abhī dekhā kyā hai

ai dil is kā tujhe andāz-e-suḳhan yaad nahīñ
vo phirī aañkh vo māthe kī shikan yaad nahīñ

shab-e-ġham meñ kal maiñ ne taare gine haiñ
zarā aañkh merī lagī ho to jānūñ

phūTe vo aañkh jo dekhe nigah-e-bad se use
ā.īne se dil-e-ārif ke musaffā hai vo ruḳh

Duubī nahīñ muddat se jo nazroñ ke bhañvar meñ
is aañkh kā jo haal huā us se na kahnā

maiñ ek chor churātā huuñ qīmtī zevar
tumhārī aañkh se aañsū churā liyā jaa.e

qaid haiñ aañkh meñ ka.ī sapne
aur hai fikr kī uḌaan alag

ḳhvāb bhī barf ke gharauñde the
jab khulī aañkh rah gayā paanī

ḳhudā ke dāman-e-rahmat se apnā dāman-e-isyāñ
vo kyā Tāñkegā jis ke aañkh meñ Dore nahīñ rahte

phir din tirī yādoñ kī muñDeroñ pe guzārā
phir shaam huī aañkh meñ aañsū nikal aa.e

irāda kar liyā gar ḳhud-kushī kā
to ḳhud kī aañkh kā paanī bahut hai

hamāre qad kā tum andāza kyā lagāoge
ham aañkh muuñd ke sahrā meñ aab dekhte haiñ

ġham Tapak paḌtā hai kyuuñ aañkh se aañsū ban kar
jab tirī yaad satā.e shab-e-hijrāñ meñ mujhe

gōgle lagā ke aañkh pe chalne lage hasīñ
vo lutf ab kahāñ nigah-e-nīm-bāz kā

paḌā thā us ke bhī ruḳh par naqāb-e-nā-maujūd
mirī bhī aañkh pe ik dast-e-ġhā.ebāna thā

kisī bahr-e-ḳhvāb kī sat.h par mujhe tairnā hai tamām shab
mirī aañkh kashtī-e-jism hai mirā bādbāñ mirā haath hai