Tags-Aansoo

unheñ āñkhoñ ne bedardī se be-ghar kar diyā hai
ye aañsū qahqaha banñe kī koshish kar rahe the

kuchh dil se jhuke hue kahā karte haiñ
aañsū bekār bhī bahā karte haiñ

palkoñ ke kināroñ pe haiñ bechain se aañsū
girte bhī nahīñ aur sambhalte bhī nahīñ haiñ

jab aañkh meñ aa ga.e haiñ aañsū
ḳhud bazm-e-tarab se uTh gayā huuñ

maiñ jāntā huuñ ki aañsū fanā kā lamha hai
use tirī nigah-e-jāvedāñ se rabt nahīñ

bahtā aañsū ek jhalak meñ kitne ruup dikhā.egā
aañkh se ho kar gaal bhigo kar miTTī meñ mil jā.egā

udaas āñkhoñ se aañsū nahīñ nikalte haiñ
ye motiyoñ kī tarah sīpiyoñ meñ palte haiñ

dil meñ ik dard uThā āñkhoñ meñ aañsū bhar aa.e
baiThe baiThe hameñ kyā jāniye kyā yaad aayā

ġham-zado!!! charāġh āñkhoñ ko sauñp do
ki aañsū sirf charāġh rotā hai

aa.egā 'tabassum' un laboñ par
aañsū bhī kabhī asar kareñge

shāḳhoñ par jab patte hilne lagte haiñ
aañsū mire dil pe girne lagte haiñ

aañkh se bahte hue aañsū nahīñ pochhe ga.e
vyarth hī rakkhā rahā rūmāl rah kar kyā milā

koī hasrat bhī nahīñ koī tamannā bhī nahīñ
dil vo aañsū jo kisī aañkh se chhalkā bhī nahīñ

asāsa rahguzāroñ kā thakan avval thakan āḳhir
nazāre chashm-e-bīnā meñ jo aañsū ban ke rahte haiñ

vo pūchhte haiñ dil-e-mubtalā kā haal aur ham
javāb meñ faqat aañsū bahā.e jaate haiñ

ise aañsū samajh kar mat girāo rahne do palkoñ pe hī goyā
yahī qatra tumhārī be-zabānī kā ahāta karne vaalā hai

us kī palkoñ se Dhalak jā.ūñ na aañsū ban kar
ḳhvāb kī tarah jo āñkhoñ meñ sajātā hai mujhe

aañsū jo terī yaad meñ Tapkā thā ek shab
ruḳhsār par jo hai ye nishāñ ishq ishq hai

un kī aadat hai muskurā denā
ham ne aañsū bahā ke dekh liyā

un se do aañkh se aañsū bhī bahā.e na ga.e
qabr-e-āshiq ke nishāñ bhī to miTā.e na ga.e