Tags-Aadmi

jab aadmī mudd.ā-e-haq hai to kyā kaheñ mudda.ā kahāñ hai
ḳhudā hai ḳhud jis ke dil meñ pinhāñ vo DhūñDhtā hai ḳhudā kahāñ hai

ham na kahte the ki 'farruḳh' aadmī achchhā nahīñ
dekh tujh ko bhī yaqīñ ab is se mil kar aa gayā

sach hai agar ki aadmī chāñd pe paañv rakh chukā
taare bhī toḌ saktā hai us ko bhī muhtamal kahūñ

kaale sūraj par ka.ī āshufta-sar vaare ga.e
aadmī kā kuchh na bigḌā devtā maare ga.e

luTne kā Dar sahī pa mohabbat kī raah meñ
jaanā to usī galī se har ik aadmī kā hai

ḳhudā vajūd meñ hai aadmī ke hone se
aur aadmī kā tasalsul ḳhudā se qaa.em hai

nigāh barq nahīñ chehra āftāb nahīñ
vo aadmī hai magar dekhne kī taab nahīñ

ek sach bolne kī aadat hai
vaise to aadmī bhalā huuñ maiñ

koī manzil nahīñ rah jā.egī sar hone ko
aadmī ko zarā allāh se Dar jaane do

yahāñ kaal se hai tarah tarah kī taklīf
fāqoñ se hue haiñ aadmī zaar nahīf

amal-o-qaul se hotā hai numāyāñ kirdār
aadmī jo bhī ho insāñ ho zarūrī to nahīñ

ġham ba-har-taur numāyāñ ho zarūrī to nahīñ
aadmī chāk-garebāñ ho zarūrī to nahīñ

sirf ābādī baḌhāne se koī hāsil nahīñ
jin meñ ho insāniyat vo aadmī paidā karo

mirī zabān ke mausam badalte rahte haiñ
maiñ aadmī huuñ mirā e'tibār mat karnā

har aadmī se vafā kī umiid mat rakkho
har ik zamīn se sonā nahīñ nikaltā hai

haiñ naqsh-e-pā jahāñ jahāñ insāñ ke, dekhnā
qadmoñ meñ aadmī ke vo ambar bhī ā.eñge

yuuñ to bahut haiñ duniyā meñ zī-rūh hastiyāñ
bas aadmī vahī hai ki jo ġham-shanās hai

jo ho jaa.e ḳhatā koī ki āḳhir aadmī ho tum
to jitnā jald mumkin ho karo us kā badal achchhā

maiñ uThūñ to rañg laa.eñ tazkaroñ ke silsile
log itnā to kaheñ ki aadmī achchhā na thā

bas-ki dushvār hai har kaam kā āsāñ honā
aadmī ko bhī mayassar nahīñ insāñ honā