Tags-Aagahi

ab kahāñ dil ke lahū meñ bhīgī bhīgī āgahī
jeb meñ ham bhī liye phirte haiñ māñge kā hunar

tirā vasl hai mujhe be-ḳhudī tirā hijr hai mujhe āgahī
tirā vasl mujh ko firāq hai tirā hijr mujh ko visāl hai

naqsh manzil hai zarre zarre meñ
rah-navardān-e-āgahī ke liye

itnī ḳhizr-āgahī ke ba.ad 'sahāb'
DhūñDiye kis ko gum-rahī ke liye

āgahī zaḳhm-e-nazāra na banī thī jab tak
maiñ ne har shaḳhs ko mahbūb-e-nazar jaanā thā

tūr-e-āgahī par jab aap hī savālī thā
kyā javāb detā maiñ apnī hī sadāoñ kā

purāne zaḳhm jo kal āgahī kā hāsil the
mire shu.ūr kī miTTī meñ paa.e jaate haiñ

khaḌā kināre pe maiñ apnī thaah kyā paatā
ki ye mo.āmla irfān-o-āgahī kā thā

maiñ ajiib lazzat-e-āgahī se do chaar huuñ
yahī āgahī mirā lutf hai mirā karb hai

husūl-e-āgahī ke vaqt kaash itnī ḳhabar hotī
ki ye vo aag hai jis aag meñ zinda jalūñgā maiñ

mohabbatoñ ke diip har qadam pe maiñ jalā.ūñgā
hai mujh meñ zauq-e-āgahī charāġh ke baġhair bhī

sidq-o-safā kī aarzū ab kyā kare koī
band āgahī kā baab agar ho to kyā kareñ

azāb-e-ehsās-o-āgahī ke vo dil-shikan ḳhvāb-pāsh lamhe
hazār ā.īne TūTte haiñ maiñ jab bhī ā.īna dekhtā huuñ

le jaa.eñ kis ke paas ye dāġh-e-ḳhud-āgahī
ai soz-e-hijr koī tirā rāz-dāñ nahīñ

'saudā' jo be-ḳhabar hai vahī yaañ kare hai aish
mushkil bahut hai un ko jo rakhte haiñ āgahī

maiñ jāntā huuñ ki kyā hai ye āgahī kā azaab
jo harf harf mirī zaat par khulā huā hai

isī sabab to baḌhā e'tibār-e-laġhzish-e-pā
hamārā josh-e-junūñ āgahī kā rahbar thā

āgahī kī mushkileñ nāguftanī
kyuuñ tujhe had se sivā jaanā gayā

āgahī ne diye ib.hām ke dhoke kyā kyā
sharh-e-alfāz jo likkhī to ishāre likkhe

āgahī jahl se bad-tar Thahrī
jāgte ḳhvāb kī ta.abīr muqaddar Thahrī