Tags-Aah

shohrat-e-be-asarī koī miTā.e kyuuñ kar
ho na dard aah meñ to koī havā kyā bāñdhe

bin tire ai but-e-ḳhud-kām ye dil ko hai ḳhatar
tere āshiq kā tamām aah kahīñ kaam na ho

aah dekhī thī maiñ jis ghar meñ parī kī sūrat
ab nazar aa.e hai vaañ nauhagarī kī sūrat

mā-sivā-e-kār-āh-o-ashk kyā hai ishq meñ
hai savād-e-āb-o-ātish diida o dil ke qarīb

husn tire huzūr ḳhud aa.e ba-iztirāb-e-dil
ai dil-e-dard-āshnā aisī bhī ek aah kar

mere savāl-e-vasl par aaj vo mujh se kah ga.e
tū abhī chand roz aur hijr meñ aah aah kar

ik āh-e-sard ke ba.ad āñkheñ muuñd liiñ 'mohsin'
ye kyā huā kabhī ThanDī havā meñ so.e na the

zindagī apnī kisī tarah basar karnī hai
kyā karūñ aah agar terī tamannā na karūñ

kisī vaqt ashk haiñ jaarī kisī vaqt aah aur zaarī
ġharaz hāl-e-ġham-e-furqat kabhī yuuñ hai kabhī vuuñ hai

us sañg-dil ke hijr meñ chashmoñ ko apne aah
mānind-e-ābshār kiyā ham ne kyā kiyā

āḳhirī baar aah kar lī hai
maiñ ne ḳhud se nibāh kar lī hai

ġhazal ke saaz haiñ faiz-ul-hasan-'ḳhayāl' jahāñ
vahāñ pe aah ba-lab bhī haiñ mahv-e-yās bhī haiñ

sarishk-e-chashm aur āh-e-sozāñ ne mere ai vaa.e ek pal meñ
bahut se jañgal kiye haiñ sarsabz aur kitne sukhā.e dariyā

ban ga.ī bād-e-sumūm aah asar se tere
is chaman meñ jo kabhī bād-e-sabā bhī aa.ī

tishnagī vīrāñ darīche muflisī āh-o-bukā
ai amīr-e-shahr is manzar kā bhī dīdār kar

ḳhayāl rukte nahīñ āhanī fasīloñ se
ki āh-e-ḳhalq kahāñ qudrat-e-sipāh meñ hai

ġham meñ kis sho.ala-rū ke dūd-e-āh
ātish-e-dūdmān-e-sahrā hai

har taraf ek āh-o-zārī har taraf ek iztirāb
kitnī sauġhāteñ liye aayā hai daur-e-inqilāb

khīñch ab naala koī aisā ki ho us ko asar
tū ne ai dil āh-e-pur-tāsīr phir khīñchī to kyā

nahīñ 'mullā' pe us fuġhāñ kā asar
jis meñ āh-e-bashar nahīñ miltī