Tags-Aahat

sun ke aahaT dauḌtā hai jism meñ aise lahū
dekh kar aayā ho bālak chāñd jaise iid kā

apnī aahaT pe chauñktā huuñ maiñ
kis kī duniyā meñ aa gayā huuñ maiñ

havā ke paañv kī aahaT gulāb kī chīḳheñ
sunī haiñ maiñ ne adālat zarā pukār mujhe

kabhī jahāñ ke muqābil rahe tan-e-tanhā
kabhī ḳhud apnī hī aahaT se Dar ga.e ham tum

koī dastak koī aahaT na shanāsā āvāz
ḳhaak uḌtī hai dar-e-dil pe bayābāñ kī tarah

shaam Dhale jab bastī vaale lauT ke ghar ko aate haiñ
aahaT aahaT dastak dastak kyā kyā ham ghabrāte haiñ

terī aahaT ko us ghar kā
konā konā jāntā hai

koī saaya koī ḳhushbū koī sadā koī dastak
ummīdoñ kī sej sajā.e ham aahaT aahaT jaage

koī aahaT bhī na sun pā.egā ḳhvābīda chaman
ḳhushk pattoñ par dabe paañv guzar jā.egī raat

abhī tak paañv kī aahaT se yā miTTī shanāsā hai
tumhāre saath chaltī huuñ to raste jaag uThte haiñ

koī bhī dastak kare aahaT ho yā āvāz de
mere hāthoñ meñ mirā ghar to hai darvāza nahīñ

koī takallum koī ishāra koī aahaT paas nahīñ
zinda rahe vīrāna-e-jāñ meñ dil kī sadā bhī kitnī der

niiñd aa.e to achānak tirī aahaT sun luuñ
jaag uTThūñ to badan se tirī ḳhushbū aa.e

rāste bhar koī aahaT thī ki aatī hī rahī
koī saaya mire baazū se guzartā hī rahā

jaane kis kī aahaT kā intizār kartā hai
TuuT to chukā hai vo dekho kab bikhartā hai

ye zulf-bar-dosh kaun aayā ye kis kī aahaT se gul khile haiñ
mahak rahī hai fazā-e-hastī tamām aalam bahār sā hai

jaise uushā kī laraztī huī pahlī aahaT
yuuñ tabassum tire hoñToñ pe hai darham-barham

be-sadā sā.atoñ meñ samā.at kī raftār rukne ko thī
ek aahaT ne mujh se kahā jaag jaao ḳhudā ke liye

ab to aahaT bhī nahīñ aatī hai
yuuñ guzartā hai guzarne vaalā

ye sannāTā hai mere paañv kī chaap
'firāq' apnī kuchh aahaT pā rahā huuñ