Tags-Aaina

shahr-e-korāñ meñ bhī ā.īna farosh aate haiñ
be-tajallī koī qarya nahīñ rahne dete

ik chāñd mujh ko tāktā rahtā hai in dinoñ
jaise sivā.e mere koī ā.īna na ho

ḳhabt hai ai ham-nashīñ aql-e-harīfān-e-bahār
hai ḳhizāñ in kī inheñ ā.īna dikhlā.e hue

ā.īna dil kā 'suhail' ā.īna-e-shauq hai bas
us kī ma.asūm nigāhī se na sharmā.e bahār

nisār us pe huuñ maiñ jis kī zindagī 'sāqī'
bashar ke auj kī ā.īna-dār guzrī hai

ḳhud apnā aks bik jaa.e asīr-e-ā.īna ho kar
yahāñ is daam par naam o nishāñ koī nahīñ degā

muqābil ho hamāre kasb-e-taqlīdī se kyā tāqat
abhī ham mahv kar dete haiñ ā.īne ko ik hū meñ

ā.īna kis se dekhā jaatā hai
rashk ke maare vo sañvar na sakā

jo rotā thā mire zaḳhmoñ pe yaaro
vo ā.īna bhī andhā ho gayā hai

hai merā chehra saikaḌoñ chehroñ kā ā.īna
bezār ho gayā huuñ tamāshā.iyoñ se maiñ

maiñ sañg-e-rah huuñ to Thokar kī zad pe ā.ūñgā
tum ā.īna ho to phir TūTnā zarūrī hai

ā.īna roz bharam rakhtā hai qaa.em merā
varna ye sach hai maiñ har roz badal jaatā huuñ

aks manzar meñ palaTne ke liye hotā hai
ā.īna gard se aTne ke liye hotā hai

mirā mazāq uḌātā hai ā.īna lekin
mirī haqīqat-e-ġham us pe āshkār nahīñ

jo tū mahr hai to zarra ham haiñ tū bahr hai to qatra ham haiñ
tū sūrat hai ham ā.īna hameñ tujh se ġharaz tujhe ham se ġharaz

gumān-e-hast hai hastī kā ā.īna-ḳhāna
so apne-āp ko bhī jaan apnī parchhā.īñ

be-chehrā lamhe bhī ā.īna rakhte haiñ
pas-manzar haiñ apnā manzar rakhne vaale

koī bhī ā.īna-rū nahīñ jo sadāqatoñ kī shabīh dikhā.e
ḳhushāmadoñ kī naqāb ne sab chhupā diye be-naqāb chehre

chashm-poshoñ se rahūñ 'shād' maiñ kyā ā.īna-dār
muñh pe kaanā nahīñ kahtā hai koī kaane ko

ye ā.īna hairat se taktā hai mujh ko
na jaane kiyā is pe biitā mirī jaañ