Tags-Aaina

ā.īna jab bhī rū-ba-rū aayā
apnā chehra chhupā liyā ham ne

kisī ne raah kā patthar hamīñ ko Thahrāyā
ye aur baat ki phir ā.īna hamīñ Thahre

jashn hogā kisī ā.īna-sifat kā shāyad
sañg hāthoñ meñ uThā laa.ī hai saarī duniyā

ik chehra aks bahāroñ kā
ik ā.īna ruḳhsāroñ kā

jo muqābil meñ balā aa.e vo maujūd us meñ hai
dil huā apnā safā se ā.īna ban kar ḳharāb

ik ḳhvāb-numā tamsīl kā dhundlā aks hai ā.īna-ḳhāne meñ
vo husn dikhā.ī nahīñ detā aur phir bhī nigāh nahīñ haTtī

dil kā ā.īna khulā ho to sukūt-e-shab meñ
maiñ bayāñ kartā huuñ ḳhud ko kabhī tū boltā hai

mahv-e-hairat huuñ ḳharāsh-e-dast-e-ġham ko dekh kar
zaḳhm chehre par haiñ yā hai ā.īna TuuTā huā

fasl-e-gul meñ hai shikast-o-reḳht kā ā.īna-dār
ek ik tinkā nasheman kā mire bikhrā huā

jab kabhī madd-e-muqābil vo ruḳh-e-zebā huā
ā.īna bhī rah gayā hairat se muñh taktā huā

hairān huuñ ki us ke muqābil ho ā.īna
jo pur-ġhurūr khiñchtā hai māh-e-mubīñ se duur

aazmā gardish-e-daurāñ tū bhī
ā.īna aur sañvar jā.egā

hameñ ā.īna banā le ki ye sāhir āñkheñ
apne hī sehr se mas.hūr na ho jaa.eñ kahīñ

hālāt ne chehroñ pe bahut zulm kiye haiñ
ā.īna agar dekhā to Dar jāoge logo

har lahza mehr-jalvoñ se haiñ chashm-poshiyāñ
ā.īna-zār dīda-e-hairāñ nahīñ rahā

aks mirā muntashir aur ye aalam ki hai
ek ik ā.īna chup ek ik patthar ḳhamosh

tere saath chehre haiñ mere sañg aa.ina
dekh aaj hotā hai kis pe tañg ā.īna

koī sā bhī paikar ho is ko Dar nahīñ lagtā
kyuuñ ki apnī fitrat se hai dabañg ā.īna

tere shahr kā qissa mere shahar kī gāthā
saaf saaf dhuñdhlāhaT zañg zañg ā.īna