Tags-Aaina

ḳhudā jo shāna hameñ banātā to ham ḳhalish hote apne dil kī
ḳhudā jo ā.īna ham ko kartā to apne hairān-kār hote

DhūñDtā phirtā huuñ darvesh o qalandar 'aḳhtar'
sab ke sab ā.īna-kirdār kahāñ kho ga.e haiñ

ġham-e-ushshāq na ho sādgī-āmoz-e-butāñ
kis qadar ḳhāna-e-ā.īna hai vīrāñ mujh se

khilaune de diye kuchh aap ne dast-e-tamannā meñ
ba-juz dāġh-e-jigar ā.īna-bardāroñ ne kyā paayā

haTtī hai jo ā.īna se paḌ jaatī hai dil par
kyā shoḳh nazar hai ki udhar bhī hai idhar bhī

huā huuñ ḳhaak us ke ġham meñ to bhī sīna-sāfī se
nahīñ khotā hai vo ā.īna-rū dil se ġhubār apnā

māh-gazīda raat hai sākit jaise koī ā.īna
os ke sabze par girne kī sannāTe meñ sadā aa.e

dil-ba-dil ā.īna hai dair o haram
haq jo pūchho ek dar hai do taraf

ḳhvāb kā rishta haqīqat se na joḌā jaa.e
ā.īna hai ise patthar se na toḌā jaa.e

aap apne dekhne ke vāste
ham ko ā.īna banāyā yaar ne

aa.ina rakkho lo ki duunā lutf aa.e vaqt-e-rañj
is taraf tum us taraf khīñche ho ḳhanjar ā.īna

dekh leñ shāyad 'nazar' vo dīda-e-insāf se
le chalo TuuTe hue dil kā banā kar ā.īna

dekhnā hai kis meñ achchhī shakl aatī hai nazar
us ne rakkhā hai mire dal ke barābar ā.īna

yuuñ kahāñ mumkin thā husn-e-ḳhās kā dīdār-e-ām
ban ga.ī āḳhir sarāpā sub.h-e-mahshar ā.īna

toḌ kar dil tum ne khoyā imtiyāz-e-husn bhī
ik tumhāre paas thā yā ab hai ghar ghar ā.īna

shoḳhiyoñ se ban gayā bijlī kisī kā aks bhī
ab to hāthoñ se nikaltā hai taḌap kar ā.īna

ban gayā ġhammāz shakl un kī dikhā kar ā.īna
jo hamārā rāz-e-dil thā ab hai un par ā.īna

shauq-e-ḳhud-bīnī sitam nīndeñ javānī kī ġhazab
be-ḳhabar sote haiñ vo rakkhā hai muñh par ā.īna

haath rakhte hī thā hāl-e-qalb-e-muztar ā.īna
dast-e-nāzuk hai hasīnoñ kā muqarrar ā.īna

aks se apne kisī ke garm-joshī qahr thī
rah gayā āḳhir pasīne meñ nahā kar ā.īna