Tags-Aaina

ā.īna mujh se kah rahā hai yahī
mere chehre pe be-qarārī hai

bahut dinoñ mire chehre pe kirchiyāñ sī rahīñ
shikast-e-zāt ko ā.īna-fām maiñ ne kiyā

ā.īna-sifat nazar se terī
aks-e-dar-o-bām ban gayā huuñ

kaun pahchānegā mujh ko merī sūrat dekh kar
jab maiñ apnī zindagī kā ā.īna ho jā.ūñgī

hai haqīqat yahī ki har chehra
dil kā ā.īna-dār hotā hai

nazar se dekh to saaqī ik ā.īna banāyā hai
shikasta shīsha-o-sāġhar ke TukḌe joḌ kar ham ne

ye ā.īna le jā ke patthar se phoḌūñ
parī kā agar darmiyāñ rū na hove

tirī tasvīr ā.īna hai merī chashm-e-hairat kā
nahīñ jaatī in ā.īnoñ kī hairānī nahīñ jaatī

be-chehra phir rahā huuñ magar is yaqīñ ke saath
ā.īna mere qad ke barābar bhī aa.egā

ā.īna kis liye us shoḳh ke muñh chaḌhtā hai
kahīñ qal.ī na khule chehra-e-nūrānī se

kahīñ aur baañT de shohrateñ kahīñ aur baḳhsh de izzateñ
mire paas hai mirā ā.īna maiñ kabhī na gard-o-ġhubār luuñ

abhī is taraf na nigāh kar maiñ ġhazal kī palkeñ sañvār luuñ
mirā lafz lafz ho ā.īna tujhe aa.ine meñ utaar luuñ

yuuñ jal ke raakh ḳhvāb ke paikar hue ki bas
ik ā.īna banā huā hairāniyoñ meñ huuñ

sitam kab un pe Dhāyā hai kisī ne
bas ā.īna dikhāyā hai kisī ne

ġhāfil o hoshyār vo timsāl-e-yak-ā.īna haiñ
varta-e-hairat meñ nādāñ aap haiñ daanā haiñ aap

añdheroñ se agar ā.īna-sāmānī huī hogī
baḌī mushkil se koī shakl nūrānī huī hogī

tirī badan meñ mere ḳhvāb muskurāte haiñ
dikhā kabhī mere ḳhvāboñ kā ā.īna mujh ko

chāho to mirī āñkhoñ ko ā.īna banā lo
dekho tumheñ aisā koī darpan na milegā

sarf chehra hī nazar aatā hai ā.īne meñ
aks-e-ā.īna nahīñ dikhtā hai ā.īne meñ

har shai lamhe kī mehmāñ hai kyā gul kyā ḳhushbū
kyā mai kyā nasha-e-ā.īna kyā ā.īna-rū