Tags-Aaina

is daur meñ ye faḳhr bhī kis ko nasīb hai
chehra to ā.īne meñ nazar aa gayā tujhe

aur phir ho gayā maiñ ā.īna-rū
us ne ik baar hī kahā ho jā

aise meñ aa jaatī hai apnī hī yaad
ā.īna hotā hai aur ham hote haiñ

ik baar jo TuuTe to kabhī juḌ nahīñ saktā
ā.īna nahīñ dil magar ā.īna-numā hai

ḳhud ko ā.īna-sifat dekhtā huuñ
mujh meñ kuchh der to qudrat Thahre

ranjish-e-hairat-sarishtāñ sīna-sāfī peshkash
jauhar-e-ā.īna hai yaañ gard-e-maidān-e-nazā.a

juuñ par-e-tā.ūs jauhar taḳhta mashq-e-rañg hai
bas-ki hai vo qibla-e-ā.īna mahv-e-iḳhtirā.a

kaash ā.īna haath se rakh kar
tum mire haal par nazar karte

ā.īna dil kā saaf kar kahlā.e saiqal-gar bhī ham
apne sivā dekheñ kise andar bhī ham bāhar bhī ham

thā mujh ko yaqīñ ik roz mirā shohra sun kar
chaar ā.īna bāñdhe aa.egā

miyān-e-aks-o-ā.īna abhī kuchh gard baaqī hai
abhī pahchān meñ aayā nahīñ hairāniyoñ kā dukh

vahāñ sunte nahīñ haiñ dekhte haiñ zaḳhm-e-peshānī
agar jaanā to ā.īna pas-e-jauhar liye jaanā

dekhiyegā sambhal kar ā.īna
sāmnā aaj hai muqābil kā

shaffāf o saaf, aur latāfat meñ be-misāl
saarā vajūd ā.īna sā hai, ye ishq hai

maiñ apne aap se māyūs to nahīñ lekin
jo aks hī na dikhā.e vo ā.īna kyā hai

mujh se na pūchho hasrat-e-ārā.ish-e-jamāl
ā.īna ban ke un ke muqābil nahīñ rahā

kyā iltijā-e-dīd karūñ dekhtā huuñ maiñ
ā.īna bhī hamesha muqābil nahīñ rahā

pal-bhar ke liye ārām nahīñ ab us ke sivā koī kaam nahīñ
tirī sūrat dekhā karte haiñ tujh ko ā.īna kahte haiñ

ā.īna le ke dekh zarā apne husn ko
aa.egī ye bahār-e-gulistāñ ḳhizāñ meñ yaad

TuuT jā.egā tililsm-e-rāstī-o-rahbarī
maiñ agar ā.īna rakh duuñ rahnumā ke sāmne