dilbaroñ ke raaz kā mahram huā

dard se dil misl-e-jām-e-jam huā

rāt-din aañsū bahe mātam huā

dard furqat kā na lekin kam huā

rah gayā huuñ ban ke ik tasvīr-e-ġham

ġham ke hāthoñ haa.e kyā aalam huā

zaḳhm khaa.e ek muddat ho ga.ī

soz-e-dil lekin nahīñ maddham huā

dard-e-ulfat kī hasīñ tashkīl meñ

imtizāj sho.ala-o-shabnam huā

ek uThnā thā nigāh-e-nāz kā

donoñ aalam kā ajab aalam huā

pur-ḳhatar pur-pech hai rāh-e-hayāt

chal sakā jitnā bhī jis meñ dam huā

phir sabā meñ hai na.ī dīvāngī

kyā mizāj-e-zulf phir barham huā

vaqt ne paiham lagā.e dil pe zaḳhm

vaqt ḳhud hī un kā phir marham huā

aa.ī ik allāhu-akbar kī sadā

sar mirā pesh-e-sanam jab ḳham huā

nā-rasā jitne rahe naale mire

is qadar īmāñ mirā mohkam huā

raaz se ahl-e-havas haiñ munharif

ye bhī goyā sajda-e-ādam huā