har chand apnā haal na ham se bayāñ huā

ye harf-e-be-vajūd magar dāstāñ huā

maanā ki ham pe aaj koī mehrbāñ huā

dil kāñptā hai ye bhī agar imtihāñ huā

jo kuchh maiñ kah chukā huuñ zarā us pe ġhaur kar

jo kuchh bayāñ huā hai ba-mushkil bayāñ huā

ab tum ko jis ḳhulūs kī ham se umiid hai

muddat huī vo nazr-e-dil-e-dostāñ huā

tūfān-e-zindagī meñ zarūrat thī jab tirī

mujh ko har ek mauj pe terā gumāñ huā

ādāb-e-qaid-o-band ne badlā ajiib rañg

kunj-e-qafas kā naam bhī ab āshiyāñ huā

aañsū nikal paḌe haiñ ḳhushī meñ tire huzūr

kis tamkanat ke saath ye dariyā ravāñ huā