hukm aayā hai ki fitne ko bhī fitna na kahūñ
jaisā dekhā hai sunā hai use vaisā na kahūñ
mere chup rahne se kyā baat sañvar jā.egī
log ḳhud bhī to samajhte haiñ kahūñ yā na kahūñ
husn ġhamze se chhuTā ishq farāmosh huā
aise hālāt meñ kyā sher bhī sachchā na kahūñ
ḳhud-kushī aur shahādat meñ hai ik farq-e-latīf
kaash jo kuchh mujhe kahnā hai vo tanhā na kahūñ
kis qadar zulm hai hālāt kā 'nūrī' sāhab
aap dhokā mujhe deñ aur maiñ dhokā na kahūñ