jo is zamīñ se kabhī phir numū karūñgā maiñ
to chehra chehra tirī justujū karūñgā maiñ
huuñ dard-mand tumhārā magar ye mat socho
jo tum kahoge vahī mū-ba-mū karūñgā maiñ
mirī vafā meñ kuchh apnī ġharaz bhī shāmil hai
so apne zaḳhm ko pahle rafū karūñgā maiñ
jo mujh ko dekhegā fauran pukār uTThegā
ki iḳhtiyār tumheñ hū-ba-hū karūñgā maiñ
agar jahāñ meñ koī aa.inā nahīñ terā
to phir tujhī ko tire rū-ba-rū karūñgā maiñ
ye zindagī to sarī-uzzavāl hai 'najmī'
dil apnā is ke liye kyuuñ lahū karūñgā maiñ