mohabbat zindagī hai zindagī kā naam mastī hai
agar mastī na ho to zindagī miTTī se sastī hai
ugaao duur tak ai dostoñ fasleñ mohabbat kī
mohabbat jis jagah hotī nahīñ la.anat barastī hai
vo rāh-e-zindagī meñ muskurānā bhuul jaatā hai
ġharībī jis ko apnī zulf ke panje meñ kastī hai
kabhī vo josh thā apne kināre kaaT detī thī
magar ab to nadī ḳhud qatre qatre ko tarastī hai
luTere aur qātil har jagah haiñ shahr meñ 'anjum'
nahīñ ma.alūm hāsil un ko kis kī sarparastī hai