āhaTeñ taaza muqaddar kī taraf
ā.inoñ ke dhyān patthar kī taraf
vasvase sīna-sipar maujūd se
vāhime kī pusht ḳhanjar kī taraf
shīsha shīsha ḳhauf har chehre pe naqsh
ik nishāna saikḌoñ sar kī taraf
haal par dushman kī poshīda-ruḳhī
aa.ina raushan sikandar kī taraf
muskurā kar ābla-tan baḌh ga.e
ḳhaar ke surḳhāb bistar kī taraf
raushnī bāhar baḌī tezāb hai
qatra qatra aañkh manzar kī taraf
sarvarī thī nok-e-pā-e-ḳhāksār
jā paḌī dastār-e-ḳhud-sar kī taraf