maiñ apne-āp se pīchhā chhuḌā ke

nikal jā.ūñ kahīñ rassī tuḌā ke

qadam āḳhir uThānā hī paḌegā

nahīñ to gir paḌūñgā Dagmagā ke

kahāñ hai ab vo mashq āvārgī kī

sambhal jā.ūñgā lekin laḌkhaḌā ke

kisī ke dar pe jaane kā natīja

maiñ dekh aayā huuñ us ke dar pe jā ke

basar kī is tarah duniyā meñ goyā

guzārī jail meñ chakkī chalā ke

likhī hai bandagī meñ sar-bulandī

milo har aadmī se sar jhukā ke

kisī ke kaam aao zindagī meñ

ḳhushī hogī kisī ke kaam aa ke