vo mard hai jo kabhī shikva-e-jafā na kare
laboñ pe dam ho magar nāla-o-bukā na kare
kisī kā mujh pe kuchh ehsān ho ḳhudā na kare
davā to kyā mire haq meñ koī duā na kare
kahāñ se jaan paḌe zindagī ke murdoñ meñ
adā-e-husn qayāmat agar bapā na kare
adā-e-be-ḳhabarī hai ki ik tilism-e-jamāl
nigāh-e-shauq se vāqif hoñ vo ḳhudā na kare
ġharaz mujhe na dar-e-tājdār tak le jaa.e
salām karne kī hājat paḌe ḳhudā na kare
koī azāb-e-jahannam meñ mubtalā ho jaa.e
uruuj pā ke zamīñ par gire ḳhudā na kare
na dil meñ dard kisī ke liye na pās-e-vafā
ham aise ārif-e-ḳhud-kām hoñ ḳhudā na kare
buzurg ban ke maiñ baiThūñ ye ho nahīñ saktā
koī baḌā mujhe samjhe 'jigar' ḳhudā na kare