ik parī ke saath maujoñ par Tahaltā raat ko
ab bhī ye qudrat kahāñ hai aadmī kī zaat ko
jin kā saarā jism hotā hai hamārī hī tarah
phuul kuchh aise bhī khilte haiñ hamesha raat ko
ek ik kar ke sabhī kapḌe badan se gir chuke
sub.h phir ham ye kafan pahnā.eñge jazbāt ko
pīchhe pīchhe raat thī tāroñ kā ik lashkar liye
rail kī paTrī pe sūraj chal rahā thā raat ko
aab o ḳhaak o baad meñ bhī lahar vo aa jaa.e hai
surḳh kar detī hai dam bhar meñ jo piilī dhaat ko
sub.h bistar band hai jis meñ lipaT jaate haiñ ham
ik safar ke ba.ad phir khulte haiñ aadhī raat ko
sar pe sūraj ke hamāre pyaar kā saaya rahe
māmtā kā jism māñge zindagī kī baat ko