vo chāñdnī kā badan ḳhushbuoñ kā saayā hai
bahut aziiz hameñ hai magar parāyā hai
utar bhī aao kabhī āsmāñ ke ziine se
tumheñ ḳhudā ne hamāre liye banāyā hai
kahāñ se aa.ī ye ḳhushbū ye ghar kī ḳhushbū hai
is ajnabī ke añdhere meñ kaun aayā hai
mahak rahī hai zamīñ chāñdnī ke phūloñ se
ḳhudā kisī kī mohabbat pe muskurāyā hai
use kisī kī mohabbat kā e'tibār nahīñ
use zamāne ne shāyad bahut satāyā hai
tamām umr mirā dil usī dhueñ meñ ghuTā
vo ik charāġh thā maiñ ne use bujhāyā hai