ham us kā naqsh-e-pā bhūle hue haiñ
ḳhudā-vandā ye kyā bhūle hue haiñ
chalo phir lauT jaa.eñ us taraf ko
jidhar kā rāsta bhūle hue haiñ
use socheñ to yaad aatā hai ham ko
ki ham to mudda.ā bhūle hue haiñ
ghire haiñ tañgnāoñ meñ kuchh aise
samundar kī havā bhūle hue haiñ
ye sāhil par zarūr utreñge ik din
parinde rāsta bhūle hue haiñ
qasam ham ko atā shīrīñ-laboñ kī
bayāñ kā zā.iqa bhūle hue haiñ