dil aa.ina hai jauhar-e-aks rū hai

yuuñ hī tujh se maiñ huuñ yuuñ hī mujh meñ tū hai

agar gul hai tū jān-e-bulbul bhī tū hai

tū har rañg meñ rañg tū har bū meñ bū hai

mirī ḳhaak ashk-e-nadāmat se tar hai

tayammum bhī kariye to hukm-e-vuzū hai

bajā lan-tarānī hai ḳhāmosh haiñ ham

jo uTh jaa.e parda to phir guftugū hai

tirī zulf-e-purḳham kā dīvāna huuñ maiñ

na zanjīr-e-pā hai na tauq-e-gulū hai

tasavvur meñ abrū ke jo mar gayā huuñ

pas-e-marg ka.aba mire rū-ba-rū hai

garebān-e-sad-chāk hai dāman-e-gul

na paivand kī jā na kār-e-rafū hai

tire muñh ko dekhūñ tire saath so.uuñ

ye hī hasrat-e-dil ye hī aarzū hai

maiñ daurān-e-sar se jo sar phoḌtā huuñ

na mai hai na saaqī na jām-e-subū hai

chhurī kyā hai talvār bhī maar qātil

qabā-e-badan ko bhī shauq-e-rafū hai

nahātā hai ġhairoñ ke hamrāh qātil

mire āb-e-shamshīr hī tā-gulū hai

tire jalve se hai dil-e-'arsh' raushan

jo vo sub.h-e-sādiq to ḳhurshīd tū hai