añdhere ko nigaltā jā rahā huuñ
diyā huuñ aur jaltā jā rahā huuñ
mirī har samt ye saa.e se kyuuñ haiñ
maiñ jaise din huuñ Dhaltā jā rahā huuñ
dhuāñ sā phailtā jaatā huuñ bujh kar
hadoñ se ab nikaltā jā rahā huuñ
zavāl-e-ādamīyyat dekh kar maiñ
kaf-e-afsos maltā jā rahā huuñ
mujhe to TūTnā hai hashr ban kar
na jaane kyuuñ maiñ Taltā jā rahā huuñ
maiñ zinda huuñ ka.ī sadiyoñ ab tak
faqat chehre badaltā jā rahā huuñ