mas.ale mere sabhī hal kar de

varna yārab mujhe pāgal kar de

vaqt kī dhuup meñ jaltā hai badan

mujh pe saaya koī āñchal kar de

aisī tahzīb se hāsil kyā hai

jo bhare shahr ko jañgal kar de

rok rakkhī hai ghaTā āñkhoñ meñ

varna bah jaa.e to jal-thal kar de

vo jo rakhtā hai mujhe nazroñ meñ

kahīñ nazroñ se na ojhal kar de

shahr meñ jaadū hai jaane kaisā

zar-e-ḳhālis ko jo pītal kar de

ġham hai sauġhāt kī sūrat yārab

tū mire ġham ko musalsal kar de