pahle kuchh din mire zaḳhmoñ kī numā.ish hogī
phir mire haal pe us but kī navāzish hogī
haañ ba-zāhir to dharā jā.egā qātil lekin
pas-e-parda usī qātil kī sifārish hogī
pyāsī dhartī yūñhī pyāsī hī rahegī yaaro
aur dariyā pe musalsal yahāñ bārish hogī
jis tarah TuuTe hue patte bikhar jaate haiñ
ham bikhar jaa.eñ usī taur ye sāzish hogī
kis ko ma.alūm hai jo rāz-e-mashiyyat hai 'obaid'
jaane kis baat pe kis shaḳhs kī baḳhshish hogī