zamīñ kī aañkh ḳhālī hai dinoñ ba.ad
falak par ḳhushk-sālī hai dinoñ ba.ad
sajāne ḳhaak kā bistar lahū ne
alag kyā rah nikālī hai dinoñ ba.ad
kahīñ chashm-e-jabīñ phir khul na jaa.e
ki dasht-e-dil jalālī hai dinoñ ba.ad
samajh meñ vaqt kā aayā karishma
nazar ḳhud par jo Daalī hai dinoñ ba.ad
kahā us ne bil-āḳhir muskurā kar
tirī duniyā nirālī hai dinoñ ba.ad
ajab ik kashmakash sī andarūñ hai
ziyā bhī kaalī kaalī hai dinoñ ba.ad
koī majnūñ magar aatā nahīñ hai
mirā sahrā savālī hai dinoñ ba.ad
ḳhudā rakkhe tujhe ābād 'sājid'
ġhazal tū ne banā lī hai dinoñ ba.ad