mahfil meñ agar sāqī-e-gulfām nahīñ hai

rindoñ ko mai-o-jām se kuchh kaam nahīñ hai

ārām se haiñ aur sabhī log jahāñ meñ

ham ishq ke māroñ ko hī ārām nahīñ hai

ai rāhrav-e-rāh-e-mohabbat ye samajh le

is raah meñ rāhat kā kahīñ naam nahīñ hai

lazzat-kash-e-āġhāz-e-mohabbat hai abhī dil

dīvāne ko andesha-e-anjām nahīñ hai

kyā aa.egā vo ahl-e-mohabbat kī nazar meñ

duniyā-e-mohabbat meñ jo badnām nahīñ hai

pur-nūr hai jo aks-e-ruḳh-e-yār se 'nayyar'

us sub.h-e-munavvar kī koī shaam nahīñ hai