vo pathrā.ī sī āñkhoñ ko bhī kājal bhej detā hai
sulagtī dopahar meñ jaise bādal bhej detā hai
maiñ apne sab masā.il bas usī par chhoḌ detā huuñ
mire uljhe masā.il kā vahī hal bhej detā hai
jahāñ vaale use jab yaad karnā bhuul jaate haiñ
zamīnoñ kī tahoñ meñ koī halchal bhej detā hai
jahāñ ahl-e-ḳhirad tevar badal kar baat karte haiñ
vo ibrat ke liye do chaar pāgal bhej detā hai
hamāre aaj kī jab koshisheñ nākām hotī haiñ
hameñ vo ek aur ummīd kā kal bhej detā hai