ham tīrgī meñ sham.a jalā.e hue to haiñ
hāthoñ meñ surḳh jaam uThā.e hue to haiñ
us jān-e-anjuman ke liye be-qarār dil
āñkhoñ meñ intizār sajā.e hue to haiñ
mīlād ho ki majlis-e-ġham mubtalā tire
āñgan meñ dal ke farsh bichhā.e hue to haiñ
hizb-e-haram ne shauq-e-junūñ ko baḌhā diyā
siine se ham butoñ ko lagā.e hue to haiñ
duniyā kahāñ thī pās-e-virāsat ke zimn meñ
ik diin thā so us pe luTā.e hue to haiñ
kab chobdār par hoñ sar-afrāz dekhiye
us shoḳh kī nigāh meñ aa.e hue to haiñ