ummīd kā baab likh rahā huuñ

patthar pe gulāb likh rahā huuñ

vo shahr to ḳhvāb ho chukā hai

jis shahr ke ḳhvāb likh rahā huuñ

ashkoñ meñ piro ke us kī yādeñ

paanī pe kitāb likh rahā huuñ

vo chehrā to ā.īna-numā hai

maiñ jis ko hijāb likh rahā huuñ

sahrā meñ vafūr-e-tishnagī se

saa.e ko sahāb likh rahā huuñ

lamhoñ ke savāl se gurezāñ

sadiyoñ kā javāb likh rahā huuñ

sab us ke karam kī dāstāneñ

maiñ zer-e-itāb likh rahā huuñ