kyā bharosa hai unheñ chhoḌ ke lāchār na jā
bin tire mar hī na jaa.eñ tire bīmār na jā
mujh ko rokā thā sabhī ne ki tire kūche meñ
jo bhī jaatā hai vo hotā hai giraftār na jā
nāḳhudā se bhī marāsim nahīñ achchhe tere
aur TuuTe hue kashtī ke bhī patvār na jā
jalte sahrā kā safar hai ye mohabbat jis meñ
koī bādal na kahīñ sāya-e-ashjār na jā
bin hamāre na tire naaz uThā.egā koī
soch le chhoḌ ke ham aise parastār na jā