itne imkān kab hue pahle
vo pashemān kab hue pahle
is meñ koī nahīñ hai anhonī
puure armān kab hue pahle
ishq ma.azūr hai mashaqqat se
ham the halkān kab hue pahle
jaise mujh ko ġhamoñ ne luuTā hai
aise mehmān kab hue pahle
āzmā.ish hai ye mohabbat kī
hādse jaan kab hue pahle
ye bhī daav na un kā ho koī
aise nādān kab hue pahle
dasht ābād to nahīñ phir bhī
itne vīrān kab hue pahle
hukm us kā hai merī bābat kuchh
saḳht darbān kab hue pahle