aahaT sī koī aa.e to lagtā hai ki tum ho
saaya koī lahrā.e to lagtā hai ki tum ho
jab shāḳh koī haath lagāte hī chaman meñ
sharmā.e lachak jaa.e to lagtā hai ki tum ho
sandal se mahaktī huī pur-kaif havā kā
jhoñkā koī Takrā.e to lagtā hai ki tum ho
oḌhe hue tāroñ kī chamaktī huī chādar
naddī koī bal khaa.e to lagtā hai ki tum ho
jab raat ga.e koī kiran mere barābar
chup-chāp sī so jaa.e to lagtā hai ki tum ho