tamām umr azāboñ kā silsila to rahā
ye kam nahīñ hameñ jiine kā hausla to rahā
guzar hī aa.e kisī tarah tere dīvāne
qadam qadam pe koī saḳht marhala to rahā
chalo na ishq hī jiitā na aql haar sakī
tamām vaqt maze kā muqābla to rahā
maiñ terī zaat meñ gum ho sakā na tū mujh meñ
bahut qarīb the ham phir bhī fāsla to rahā
ye aur baat ki har chheḌ lā-ubālī thī
tirī nazar kā diloñ se mo.āmla to rahā