jab dekho chhup jaatā hai tū
mujh se kyā sharmātā hai tū
tere yaar haiñ tere jaise
ḳhud ko kaisā paatā hai tū
maiñ ne us ko bhī dekhā hai
jis kī qasmeñ khātā hai tū
haañ mujh ko ma.alūm nahīñ hai
merī ġhazleñ gaatā hai tū
dil to apne aap meñ gum hai
ab kis ko taḌpātā hai tū
ḳhvāb meñ hī jab milnā hai to
āñkheñ kyuuñ khulvātā hai tū
kaise kaise maiñ bhūlā huuñ
kaise yaad aa jaatā hai tū
aisā bhī kyā chhupnā 'momin'
DhūñDo to mil jaatā hai tū