haqq-e-ne.amat adā nahīñ hotā
ham se shukr-e-ḳhudā nahīñ hotā
kyā visāl-e-ḳhudā nahīñ hotā
ishq-e-sādiq se kyā nahīñ hotā
be-bahā dil ko nazr kartā kaun
husn agar dilrubā nahīñ hotā
aah par hans ke ye diyā ta.ana
yuuñ to nām-e-vafā nahīñ hotā
huuñ agar laakh baar bhī sadqe
husn kā den adā nahīñ hotā
hijr meñ ġham-gusār mahram-e-rāz
dard-o-ġham ke sivā nahīñ hotā
jo satātā hai dil jalātā hai
us kā hargiz bhalā nahīñ hotā
ishq kā naam muft hai badnām
ishq achchhā burā nahīñ hotā
aah se arsh hiltā hai ai 'shād'
fazl-e-maulā se kyā nahīñ hotā