firāq-e-yār meñ huuñ is qadar udaas udaas
baġhair bachchoñ ke jaise ho ghar udaas udaas
shikārī aa.e haiñ ya.anī parind jā.eñge
ye baat sun ke huā hai shajar udaas udaas
na jaane kyā mire zaḳhmoñ meñ dekh baiThā hai
ki ho gayā hai mirā chārāgar udaas udaas
ye vo galī hai jahāñ shādmānī rahtī hai
so mere dost yahāñ se guzar udaas udaas
kabhī kabhār to ḳhud zaar zaar rotī haiñ
udāsiyāñ bhī mujhe dekh kar udaas udaas
ye kyā huā ki Dubo kar mujhe baḌe din se
ḳhafā ḳhafā sī nadī hai bhañvar udaas udaas
natīja tark-e-ta.alluq kā ek sā kab hai
udhar vo ḳhush hai bahut maiñ idhar udaas udaas