baġhaur dekh rahā hai adā-shanās mujhe

bas ab zalīl na kar ai nigāh-e-yās mujhe

ye dil hai shauq meñ be-ḳhud vo aañkh nashshe meñ chuur

jhukā na de su-e-sāġhar bhaḌaktī pyaas mujhe

udhar malāmat-e-duniyā idhar malāmat-e-nafs

baḌā azaab hai aa.e hue havās mujhe

palaT do baat na lo muñh se naam ruḳhsat kā

abhī se ghar nazar aane lagā udaas mujhe

jo multafit haiñ ye nazreñ badal bhī saktī haiñ

banā chukā hai zamāna adā-shanās mujhe