chāheñ haiñ ye ham bhī ki rahe paak mohabbat
par jis meñ ye duurī ho vo kyā ḳhaak mohabbat
aa ishq agar qasd tijārat hai ki is jā
haiñ tuuda har ik ghar do sah aflāk mohabbat
nāseh tū abas sī ke na rusvā ho ki zālim
rakhtā hai garebāñ se mire chaak mohabbat
apne to liye zahr kī tāsīr thī is meñ
go vāste aalam ke ho tiryāk mohabbat
bulbul to huuñ 'qā.em' maiñ par us baaġh kā jis meñ
be-rutba hai misl-e-ḳhas-o-ḳhāshāk mohabbat