maanā apnī jaan ko vo bhī dil kā rog lagā.eñge
ahl-e-junūñ ḳhud kyā samjhe haiñ nāseh kyā samjhā.eñge
shāyad ashk o aah se hī ab bār-e-alam kuchh halkā ho
ham bhī kareñge shola-fishānī ham bhī lahū barsā.eñge
jī na sakeñge jiine vaale tark-e-ta.alluq kar ke magar
aap ko bhī kuchh vahshat hogī aap bhī kuchh pachhtā.eñge
milnā terā mushkil thā to jī lete is mushkil par
pā kar tujh ko khone vaale kyūñkar jī bahlā.eñge