aañsū tumhārī aañkh meñ aa.e to uTh ga.e
ham jab karam kī taab na laa.e to uTh ga.e
baiThe the aa ke paas ki apnoñ meñ thā shumār
dekhā ki ham hī nikle parā.e to uTh ga.e
ham harf-e-zer-e-lab the hameñ kaun roktā
lafzoñ ke tum ne jaal bichhā.e to uTh ga.e
baiThe chhupā chhupā ke jo dāman meñ āftāb
ham ne bhī kuchh charāġh jalā.e to uTh ga.e
kyā thā hamāre paas ba-juz ik sukūt-e-ġham
charke bahut jo tum ne lagā.e to uTh ga.e