vo jis ne mujh ko taḌpāyā bahut hai
mujhe vo shaḳhs yaad aayā bahut hai
mohabbat kī kaTīlī rahguzar meñ
ḳhushī kam aur ġham paayā bahut hai
vo mujh ko chhoḌ kar apne kiye par
bahut royā hai pachhtāyā bahut hai
kisī kā naam sunte vaqt mujh ko
tumhārā naam yaad aayā bahut hai
ka.ī barsoñ talak zālim jahāñ ne
hameñ milne ko tarsāyā bahut hai
maiñ is dil ko jalānā chāhtā huuñ
mujhe is dil ne taḌpāyā bahut hai