ab ke ye baat zehn meñ Thānī hai aur bas

ham ne to apnī jaan bachānī hai aur bas

nuqsān to hamārā hai kachche gireñge ham

tum ne to ek shāḳh hilānī hai aur bas

us ne ḳharīdne haiñ ka.ī saat rañg ḳhvāb

ham ne siyāh niiñd kamānī hai aur bas

ham ne baḌe jatan se jalānā hai ik charāġh

us ne havā ko uñglī dikhānī hai aur bas

itnī sī dāstān hai kāġhaz kī naav kī

dariyā hai aur us meñ ravānī hai aur bas

ham ne kahā ki ashk lahū hai jigar kā dost

us ne kahā ki chhoḌiye paanī hai aur bas